2014年12月12日 星期五

一分鐘醫生


最近頸上有腫塊,很痛,應該是淋巴腺發炎,大爺話幾十歲啦!找醫生看看安全啲,於是去找醫生,看開的醫生休息,找個新醫生看,一坐低,醫生看了一眼話淋巴腺發炎,跟著問有冇試過重病入院,有冇藥物敏感,便開藥,叫一星期回來覆診,走得!哼!望聞問切?乜都冇做,收我二百五,仲返來找你!

大爺平常用槍指都不看醫生,非常辛苦才會自動自覺去看醫生,大爺最近辛苦得自動要看醫生,看了一次醫生沒有好轉,再轉另一醫生,因時間限制,我去掛號,護士說大爺是第十八個,半小時大爺到,護士說已過了籌,要等一個病人後補看,吓半小時已看了超過十八個病人,也是敷衍看症,收三百二,沒有好轉還嚴重了,結果誤疹引致要看專科醫生,細少話現在很多是一分鐘醫生。
一分鐘醫生醫德何在?

16 則留言:

  1. 我之前看脊醫,平均時間是三至五分鐘,收費要五十紐元,沒藥吃,只在你背、頸或大腿上按按就叫你走得,因為去看他是為了保健,所以就算冇事也會叫你每個月去睇佢兩次……
    呢啲屬唔屬於叫一分鐘醫生呀?

    回覆刪除
    回覆
    1. 而家看醫生,血壓唔駛量,熱唔駛探,脈唔駛聽,如果醫得好都算,大爺本來唔駛睇專科,就係尼啲一分鐘醫生,搞到無端辛苦多個幾星期。你個係脊醫都唔知算唔算是醫生。

      刪除
    2. 呢度又幾好噃,家庭醫生個醫務所有兩三個診室,病人先依次先在其中安定,醫生就逐間診室行入去診症,很詳細,開埋個電腦解釋病歷,如果有提問立即解答,答唔倒上網揾,亦同時將診症資料輸入病人病歷。如果要轉介,立即輸入電腦俾對方專科要求排期,好好!通常睇醫生都會遲,因為話就話每個病人約十五分鐘,但係呢度的医生剩係同你傾下閑偈都幾分鐘啦....

      刪除
    3. 大哥:照你噉講加拿大啲醫生唔係幾好,而係真係好好,香港醫生傾下閑偈,真係想〝創個心〞,唔係冇係一百個都未必有一個呀!我甲狀腺有小小問題,以前睇醫生,大多數會叫我吞口水猛撖我條頸,而家腫成噉都係咁意篤下腫嘅地方,其他位置望都吾望,今次大爺原來係紅眼症,本來係好小事,唔係唔睇,係醫生懶到無成隻眼檢查,當普通發炎,無對症下藥,越睇越衰,結果由紅腫變成流膿,紅眼症係會傳染,但最初醫生話係發炎,一直冇做防範措施,而家流膿腫到睜不開眼,專科醫生話好少人紅眼症會咁嚴重,害得我全屋要大消毒,啲面巾衣服更要消毒,天寒地凍我要瞓沙發,瞓到腰痛難眠!如果一開始對症下藥,噉多日已經痊癒啦!而家星期二仲要去覆診,激氣!

      刪除
    4. 仲未止於此,上次年度體檢(醫療咭包括老人家可以每年體檢一次),發現老雨血壓高了,医生立即寫紙驗血,化驗所就好似吸血鬼咁抽咗老雨三筒血,血糖、胆固醇、連前列腺癌嘅可能性都驗埋,喼得出嘅都驗埋,只係收前列腺癌嘅化驗費,其他全喺醫療保險包了。醫生收到報告話要見老雨,佢話血糖責界可能係引致血壓高嘅原因,要老雨戒糖!!!
      跟住用電腦聯系有關糖尿病課程,要老雨「番學」,一連三堂,單對單聽專科人仕教點樣預防同減低糖尿病嘅影响,服未!

      刪除
    5. 唔止服!仲好羨慕!三十幾歲果陣試過大腿筋痛,痛到穿唔到袜,行動不便,找私家醫生打了支消炎針不見效,便做物理治療,得以痊癒,但費用昂貴,到廿年前腰痛於是去賽馬會看街症,醫生寫紙去照X光,護士同我講,骨折同骨裂才照到,筋有事X光係照唔到架,教我下次睇報告同醫生講,覺得上次做物理治療效果好好,可否轉介去做物理治療,難得有人教路,於是覆診照講,點知個衰醫生話,你上次做完而家咪又痛!你冇得醫架啦!風濕嚟架!開左一支冬青油一大袋止痛藥,火都嚟埋,唔轉介就算啦,仲話我冇得醫!果陣我至四十幾,噉快就冇得醫!有冇諗下個病人感受架!結果去靈實醫院辦的診所做物理治療,比私家平一半,一做做了廿幾次,並為我度身訂做一套腰部伸展運動,當時好勤力做左年幾,漸漸冇痛,但跟住就因工作太忙冇做,祇要太粗勞便腰痛,由其我以前的行業,十居其九腰都有事,而家一痛就去按摩下,便可舒緩。

      刪除
  2. 我估政府醫生同私家醫生嘅最大分別,就係睇症所用嘅時間!政府醫生做又三十六,唔做又三十六,你急佢唔急,但私家醫生就多勞多得!

    回覆刪除
    回覆
    1. Philip:你講啱一半,你係工務員,比較好好多,入阮的待遇都唔同啦!政府醫生都有多好馬苦嘅醫生,我遇唔少,不過私家俾左噉多錢都噉,真係激氣!

      刪除
  3. 軒軒:您講得啱,依家D医生真係幾化學,我最近又係頸痛,似瞓"勵頸",成+日都仲係痛,去睇醫生就話耳仔發炎,但我耳仔唔痛喎,比4日药比埋抗生素,收380,食緊药個4日係唔痛,食完又痛過,再去睇醫生,又話我血壓高影響,都唔知信邊次,好彩終於頸唔痛了,但比佢嚇一嚇,原本我血壓偏低變咗血壓高,佢要我每日量血壓,二星期後睇吓使唔使食藥喎,唉!

    回覆刪除
    回覆
    1. 小月:原本血壓偏低變咗血壓高,你有冇食過中藥呀?我有噉嘅經驗喎,老父有幾次由血壓偏低變咗血壓高,中心的職員即刻問係唔係食過中藥?老父真係感冒食左中藥,血壓升高,如果個醫生唔好,換左佢,駛錢事小,延誤病情事大,我哋幾十歲啦!唔襟捱,有病要盡快治療呀!

      刪除
    2. 軒軒:謝謝您提醒我,我近排係有睇過中醫,因以往一轉天氣,就會鼻水倒流,引至嗽,西醫就比敏感药食,今年聽朋友話不如您轉中醫試吓,所以睇咗幾次中醫喎。其實呢两日都穩定咗D,而我睇那西醫,都睇咗近三+年了,一向都幾細心和準確的,但近年唔知係咪多人睇,和年紀大咗,加上可能揾夠$,求其咗,不過,明天新抱會和我去她的醫生朋友處檢查一吓,希望冇事喇,謝謝您的關心!

      刪除
    3. 小月:如果唔係老父同老媽試過幾次食左中藥血壓升高,我都唔知會有咁情形,有時醫生睇得耐見來來去去都係噉上下病,會大意麻痺都唔出奇,祝你藥到病除,早日康復!

      刪除
  4. 平安、健康是福,是我們孖寶!希望福可雙至!

    回覆刪除
    回覆
    1. Stella:希望孖寶如影隨形跟隨大家!

      刪除
  5. 軒姐:祝早日痊癒!快D出書.

    回覆刪除
    回覆
    1. 多謝惠惠關心,我已經痊癒了,新書已經排印中,我都好心急呀!

      刪除