2014年12月19日 星期五

雙冬枝竹炆羊肉~附食譜

這幾天天氣寒冷,很久沒有炆羊肉,既可暖胃,更可大快朵頣 ,近年百物騰貴,我家附近街市一向偏貴,今年羊肉賣116@斤,一如過往去觀塘買,78@斤,反正都是冰鮮,價錢相差甚遠除了車資仍有化算。 相機壞了祗好將舊相片食譜重貼

  雙冬枝竹炆羊肉
材料:
   羊肉磅半
   冬筍兩個
   冬菰十個
   白蘿蔔半個至一個
   生薑十多片
   蒜頭幾粒
   乾蔥頭幾粒
   陳皮一角浸軟去囊
   草果一粒用刀拍至開口
  馬蹄數粒
  枝竹隨意
調味料:羊腩醬大半包
雞粉 3/4 茶匙
   冰糖一小粒
做法:       






   將羊肉洗淨,水滾放入蘿蔔及羊肉汆水取出去掉蘿蔔
冬筍去殼及切去老根部份,切件放入滾水中煑五分鐘,用水沖洗至凍備用
羊肉出水,滴乾水放入白鑊鈔至乾身
  下油加入薑片,蔥頭,蒜頭爆香灒酒,加筍片馬碲及加入調味料兜炒後
加蓋過面之水炆至差不多腍 

 加入冬菰冬及枝竹再炆一會至腍即可。上桌前可加些生菜
小小心得:今次用羊頸,較瘦和滑,用白蘿蔔出水,及加入草果可去羶味。
炆後之薑片非常好吃,喜歡可加多點薑。
    冬菰預先浸軟去蒂用生抽,糖,豆粉撈勻蒸十分鐘,冬菰
    炆得太久會韌,所以待羊肉差不多夠腍才加入。
  可轉入煲仔, 可加些生菜或糖蒿,一面加熱一面吃。 

8 則留言:

  1. 好味!啱晒天寒地凍的日子。羊肉好貴,我好幾年冇買羊腩,改左炆牛腩,點知連牛腩都成百蚊斤,覺得吾抵,唯有吾食。

    回覆刪除
    回覆
    1. 記得第一次介紹羊肉,觀塘都係賣50元,而家啲嘢貴到飛起,有時真係有感巧婦難為無米之炊,不過一年食一兩次冇所謂啦!

      刪除
  2. 我住呢個小鎮有間大超市,常常都有些便宜的羊腩下欄賣,一大包約五公斤只是$8,不過而家佢地醒咗已賣到$4/kg ,但有八成唔食得(係肥脂和些骨頭),最近因聖誕節臨近,昨天又有十多廿包推出來賣,仲係$6一包好抵,除剩可吃的剛巧仍有2kg多啲啲……
    以前我用柱侯、麵豉、南乳、八角、果皮、薑等等來炆,下次我要學你的方法,謝謝你的分享心得。
    此祝軒姐闔家冬至、聖誕及新年佳節愉悅,身體健康!

    回覆刪除
    回覆
    1. 噉平要食多啲呀!香港急凍都成$40/bl,羊腩醬其實都係柱侯、南乳,香港雜貨舗就包好一包包賣,好方便。有時冇買草果我都加兩粒八角架,應該是汆水後再走油,一來太油二來怕啲油用完會有羶味,我偷雞唔做走油改用白鑊去爆炒,等你試完話我知改善的地方。

      刪除
  3. 天寒地凍,呢個餸最啱了,我冇放冬笋,因先母教落,佢話D笋偏"濕毒"喎,反為會放些竹蔗和馬碲,話冇咁燥熱。

    回覆刪除
    回覆
    1. 我母親都係噉講,但原來筍有營養價值的強白質很高,台灣江浙一帶都愛吃筍呢!祗是有胃病真的不宜食用,用竹蔗和馬碲是較為潤,年紀有番噉上下,樣樣嘢都係淺嚐穩陣啲。

      刪除
  4. 睇完之後,即時有食羊腩煲嘅衝動!

    回覆刪除
    回覆
    1. 天寒地凍食羊腩煲真係好正。

      刪除