筍炒肉絲

    最近馬蹄筍上市，馬蹄筍較易處理，很少會苦，汆水即可用。往年要吃筍便得到油麻地旺角一帶才有售，最近我家附近開了一新菜檔，近月已賣了多次馬蹄筍，大爺愛吃筍，買得容易，已吃了多次，本來用五花去炆，但怕大爺吃太多肥肉，改用梅頭瘦去炒，一樣好味，一般調味加了點蒜茸辣椒醬，醒胃，大爺吃完飯仍忍不住坐在飯桌前光吃筍絲，直至全碟筍絲吃光，大爺真的非常愛吃筍！

與細少去吃特色甜品

    我一向嗜吃甜，尤其是雪糕，開心可以食，唔開心更加要食，細少有一天假期，帶我去茶木吃雪糕蜜糖磚，自知一向食量少，已制止細少點太多食物，

 二人共享一份芒果雪糕香草蜜糖磚， 

麻醬手作麵，味道很清麵很好吃，

 細少的香芒沙冰，

 細少替我點的一杯香芋沙冰，

 鹽酥雞，

份量實在太多，吃了少許已飽，

細少祗好善後，

加一服務免小費合共301.5。

綠茶卷蛋

    好朋友一家愛吃綠茶食品，我家除了大爺，我和細少都不吃，想做一條綠茶味卷蛋送給好朋友，多年前做過兩三次卷蛋便沒有再做，太久沒有做，手勢已生疏了，嗱嗱嗱……都話唔好貪心咯！個蛋糕得9吋長，咁多餡唔夠長度包餡，CC氣趁未定型打開再卷過，盡量卷實啲，終於勉強收到口。

 看顏色己知是勁重綠茶味卷蛋，

           咭咭......見過人切開影完相才送俾人未？

           好彩好朋友並不介意。

煎封黃花

       鷹鯧實在太貴，今日見有黃花好靓，買來做煎封，30個大洋，銷情不俗喎！個奄尖細少冇異議。

材料：

白花一條

青蔥一把切段

芡汁：

生抽3茶匙

糖1茶匙

生粉1茶匙

水適量

麻油少許

薑汁酒1湯匙

做法：

魚洗淨抹乾水，灑上少許鹽稍醃，起鑊下油，兩面煎至金黃，灒薑汁酒，下青蔥，埋薄芡即成。

小小心得：鑊與油要熱才下魚，下魚後轉慢火，煎完一面才煎另一面，不要反來覆去，魚皮便不爛。

百寶齋湯

松姬茸非常香

        天氣實在太熱，要煲些湯水飲下，煲個齋湯，大爺不愛吃素，試試加多一點食材種類，找出雪櫃有包栗子乾，隔晚預浸，剛買了包松姬茸，一於浸少少煲湯，大爺愛吃煲綿的蓮子及豆類，投其所好，材料變得非常豐富，有扁豆、赤小豆、黑豆、眉豆、綠豆、紅豆、花生、腰果、栗子乾、白蓮子、甘筍，節瓜。湯非常清甜，是夏日一款不錯的湯。雖然蓮子心有益，但有苦味，不想湯有苦味便一定要將蓮子心去除。

鹹到飛起急凍龍蝦伊麵

        與大爺逛超市，見有急凍龍蝦減價，一百元兩隻，一定要買兩隻，無一隻賣，又係捆綁式迫人買！大爺要買，我就不想買，試過甚麼長腳蟹，皇帝蟹都是不好吃的，即使在酒店的自助餐吃此類急凍食物，也是強差人意，但大爺認為今次不是急凍熟食，未試過要試試，大爺話今晚不煮飯，買來做芝士龍蝦伊麵。此龍蝦肉除了不好吃，還鹹到飛起，我以為自己重手，兩隻龍蝦不過下了1/8茶匙鹽作底味，照理不會鹹啊！連龍蝦鉗剝去殼後都鹹到飛起，即刻試個麵和汁，個汁同麵很配好，很好味！即與調味無關。唉！今次真係好有海水味嘞！海水咁鹹呀！！哂錢哂心機，都話左唔好買喇！但大爺就一次又一次希望會有意外驚喜，又去買。好彩個麵與汁無問題，仲可以入口，否則成碟幫襯大口仔，出去吃都得嘞！

涼瓜炒五花肉

    細少一向不吃涼瓜，涼瓜又名半世瓜，有人說要嚐過人生苦痛才懂得欣賞，軒也是近二十多年前才開始吃，所以沒有逼細少吃，將來他可能會愛吃也說不定呢！趁細少有飯局不回家吃飯，便煮涼瓜，平常炒涼瓜多數用排骨或牛肉炒，大爺最近中午在外用膳試了一款用五花肉炒，回來說很好吃，

軒問：下了甚麼醬料去炒，

回覆係〝唔知道〞！

軒：咁是否蒜頭豆豉，

大爺：唔係！

〝唔知道〞咁點煮呀？

睇下雪櫃有甚麼醬料，有嘞，用麵豉醬，加點辣椒醬，五花切薄片，搞掂嘞，幾醒胃喎！大爺沒異議。